जनकपुरधाम । गत शुक्रवारदेखि सुरु भएको अत्यधिक चिसो र शितलहरका कारण बालबालिकाको स्वास्थ्यमा पर्न सक्ने जोखिमलाई ध्यानमा राख्दै जनकपुरधाम उपमहानगरपालिकाले एक दिनका लागि नगरभित्रका पठनपाठन बन्द गरेको छ ।
उपमहानगरपालिकाले आज बुधवार सुचना जारी गरि शुक्रबार ११ पुसमा एक दिनका लागि सबै सामुदायिक तथा संस्थागत विद्यालयमा जाडो बिदा दिएको छ ।
बढ्दो चिसोका कारण विद्यार्थीको स्वास्थ्य सुरक्षा सुनिश्चित गर्न उक्त निर्णय गरिएको जनाइएको छ । यस शैक्षिक सत्रको शैक्षिक क्यालेन्डरअनुसार १७ पुष गतेदेखि माघ २ गतेसम्म तोकिएको जाडो बिदाबाट कट्टा हुने गरी शुक्रवारको विदा व्यवस्थापन गरिएको सुचनामा उल्लेख छ ।
साथै, मौसममा सुधार नआए थप जाडो बिदाको निर्णय गरी पुनः सूचना प्रकाशित गरिने उपमहानगरपालिकाले जनाएको छ । शिक्षा, युवा तथा खेलकुद विकास शाखा प्रमुख अन्जु पाण्डेयद्वारा जारी सूचनाको बोधार्थ जिल्ला प्रशासन कार्यालय धनुषा, शिक्षा विकास तथा समन्वय इकाई धनुषा तथा सम्बन्धित शैक्षिक संस्थामा पठाइएको छ ।
सम्बन्धित खबर
